an-Nazi`at - Yoruba:Mikail

79:1 Allāhu fi àwọn mọlāika tó ń fi ọ̀nà èle gba ẹ̀mí àwọn aláìgbàgbọ́ búra.

79:2 Ó tún fi àwọn mọlāika tó ń fi ọ̀nà ẹ̀rọ̀ gba ẹ̀mí àwọn onígbàgbọ́ òdodo búra.

79:3 Ó tún fi àwọn mọlāika tó ń yára gágá níbi àṣẹ Rẹ̀ búra.

79:4 Ó tún fi àwọn mọlāika tó máa ṣíwájú ẹ̀mí àwọn onígbàgbọ́ òdodo wọnú Ọgbà Ìdẹ̀ra tààrà búra.

79:5 Ó tún fi àwọn mọlāika tó ń ṣètò nínú sánmọ̀ àti ilé ayé pẹ̀lú àṣẹ Allāhu búra.

79:6 Ní ọjọ́ tí ìmìtìtì máa mi gbogbo ayé tìtì.[1]

79:7 Ohun tí ó máa tẹ̀lé e máa ṣẹlẹ̀ tẹ̀lé e.[1]

79:8 Àwọn ọkàn yóò máa gbọ̀n pẹ̀pẹ̀ ní ọjọ́ yẹn.

79:9 Ojú wọn yó sì wálẹ̀ ní ti ìyẹpẹrẹ.

79:10 Wọn yóò wí pé: “Ṣé Wọ́n tún máa dá wa padà sí ìbẹ̀rẹ̀ ìṣẹ̀mí (bíi tayé ni)?

79:11 Ṣé nígbà tí a ti di eegun tó kẹfun tán?”

79:12 Wọ́n wí pé: “Ìdápadà òfò nìyẹn nígbà náà (fún ẹni tó pè é ní irọ́.)”

79:13 Nítorí náà, igbe ẹyọ kan sì ni.

79:14 Nígbà náà ni wọn yóò bára wọn lórí ilẹ̀ gban̄sasa.

79:15 Ǹjẹ́ ọ̀rọ̀ (Ànábì) Mūsā ti dé ọ̀dọ̀ rẹ?

79:16 (Rántí) nígbà tí Olúwa rẹ̀ pè é ní àfonúfojì mímọ́, Tuwā.

79:17 Lọ bá Fir‘aon, dájúdájú ó ti tayọ ẹnu-ààlà.

79:18 Kí o sì sọ pé: “Ǹjẹ o máa ṣàfọ̀mọ́ ara rẹ (kúrò nínú àìgbàgbọ́) bí?

79:19 Kí èmi sì fi ọ̀nà mọ̀ ọ́ dé ọ̀dọ̀ Olúwa rẹ, kí o sì páyà (Rẹ̀).”

79:20 Ó sì fi àmì tó tóbi hàn án.

79:21 (Àmọ́) ó pè é ní òpùrọ́. Ó sì yapa (rẹ̀).

79:22 Lẹ́yìn náà, ó kẹ̀yìn sí i. Ó sì ń ṣiṣẹ́ (takò ó).

79:23 Ó kó (àwọn ènìyàn) jọ, ó sì ké gbàjarì.

79:24 Ó sì wí pé: “Èmi ni olúwa yín, ẹni gíga jùlọ.”

79:25 Nítorí náà, Allāhu gbá a mú pẹ̀lú ìyà ìkẹ́yìn àti àkọ́kọ́ (nípa ọ̀rọ̀ ẹnu rẹ̀ ìkẹ́yìn yìí àti àkọ́kọ́).[1]

79:26 Dájúdájú àríwòye wà nínú ìyẹn fún ẹni tó ń páyà (Allāhu).

79:27 Ṣé ẹ̀yin lẹ lágbára jùlọ ní ìṣẹ̀dá ni tàbí sánmọ̀ tí Allāhu mọ?

79:28 Allāhu gbé àjà rẹ̀ ga sókè. Ó sì ṣe é ní pípé tó gún régé.

79:29 Ó ṣe òru rẹ̀ ní dúdú. Ó sì fa ìyálẹ̀ta rẹ̀ yọ jáde.

79:30 Àti ilẹ̀, Ó tẹ́ ẹ pẹrẹsẹ lẹ́yìn ìyẹn.[1]

79:31 Ó mú omi rẹ̀ àti irúgbìn rẹ̀ jáde láti inú rẹ̀.

79:32 Àti àwọn àpáta, Ó fi ìdí wọn múlẹ̀ ṣinṣin.

79:33 Ìgbádùn ni fún yín àti fún àwọn ẹran-ọ̀sìn yín.

79:34 Ṣùgbọ́n nígbà tí ìparun ńlá bá dé,

79:35 ní ọjọ́ tí ènìyàn yóò rántí ohun tó ṣe níṣẹ́.

79:36 Wọ́n sì máa fi Iná hàn kedere fún (gbogbo) ẹni tó ríran.

79:37 Nítorí náà, ní ti ẹni tó tayọ ẹnu-ààlà,

79:38 tí ó tún gbé àjùlọ fún ìṣẹ̀mí ayé,

79:39 dájúdájú iná Jẹhīm, òhun ni ibùgbé (rẹ̀).

79:40 Ní ti ẹni tí ó páyà ìdúró níwájú Olúwa rẹ̀, tí ó tún kọ ìfẹ́-inú fún ẹ̀mí (ara rẹ̀),

79:41 dájúdájú Ọgbà Ìdẹ̀ra, òhun ni ibùgbé (rẹ̀).

79:42 Wọ́n ń bi ọ́ léèrè nípa Àkókò náà pé: “Ìgbà wo l’ó máa ṣẹlẹ̀?”

79:43 Níbo ni ìwọ wà sí ìmọ̀ rẹ̀ ná?[1]

79:44 Ọ̀dọ̀ Olúwa rẹ ni òpin ìmọ̀ nípa rẹ̀ wà.

79:45 Ìwọ kúkú ni olùkìlọ̀ fún ẹni tó ń páyà rẹ̀.

79:46 Ní ọjọ́ tí wọ́n máa rí i, wọn máa dà bí ẹni pé wọn kò gbé ilé ayé tayọ ìrọ̀lẹ́ tàbí ìyálẹ̀ta (ọjọ́) kan.

an-Nazi`at (النَّازِعَات)